Əvvəlcə “Destiny 2” oyunu haqqında qısa məlumat:
Hələ 2017-ci ilin sentyabr ayında ilk dəfə PlayStation 4, Xbox One və PC platformaları üçün buraxılan “Destiny 2” oyunu ödənişli idi. Buna baxmayaraq oyun özünəməxsus qeympleyi, keyfiyyətli oyun modelləri və ətraf mühitin gözəl təsviri ilə kifayət qədər diqqət cəlb edə bilmişdi. 2019-cu ilin sonlarında isə “Destiny 2” artıq oynamaq üçün ödənişsiz olur və bununla da oyunçu kütləsini daha da genişləndirir.
Ümumilikdə “Destiny 2” oyunçuya iki növ məzmun təqdim edir:
– PvE (Person vs Environmet .ing) el dilində desək oyunçular botlara qarşı
– və PvP (Person vs Person .ing) oyunçu oyunçuya qarşı
rejimləri mövcuddur. Hər iki halda siz dostlarınızla oyuna daxil olub birgə şən vaxt keçirə bilərsiniz.
“Destiny 2” oyunu digər platformalara proqresin daşınmasını dəstəkləyir (cross-save .ing). Lakin hələ ki, kross-platforma tipli oyunu dəstəkləmir. Sadə dil ilə desək PC platformasındakı oyunçular, PS4 platformasındakı oyunçularla birgə oynaya bilməz. Buna baxmayaraq yaradıcı Bungie şirkəti kross-platfrominqin realizəsi üzərində çalışır və artıq PS4 və PS5 konsolları arasında bunu realizə edə bilib.
Hazırda – 2021-ci ildə biz tək PC platforması üçün “Destiny 2” oyununda 54 min aktiv (onlayn, hazırda oynayan) oyunçu müşahidə edirik.
Biz də “Destiny 2” oynamaq qərarına gəldik
Oyuna ilk daxil olduqda oyunçuya hər şey çox sadə dildə izah olunur. Mövcud olan 3 ixtisasdan birini seçib, istəyə görə həmin personajın xarici görünüşünü dəyişdikdən sonra oynamağa başlamaq olar. Əvvəl, sözsüz ki, bizə qeympley barədə tövsiyələr verilir, idarəetmə və interfeys ilə tanışlıq prosesi başlayır. Qarşılaşdığımız ilk oyun məzmunu isə PvE tiplidir.
Əsas süjet kampaniyasına keçid olduqca axıcıdır və adamı yormur. İnterfeys, qeympley və oyunun digər elementləri ümumilikdə RPG və şuter (shooter .ing) janrlarından mənimsənildiyi üçün oyun mühitinə adaptasiya bir neçə dəqiqə vaxt alır. Oyunçular arasında maraqlı qarşılıqlı əlaqənin yaradılması isə oyunu daha da sosiallaşdırır. Bu hissəyə biz oyunda qeydə aldığımız anları sizə video şəklində təqdim edərkən qayıdacayıq.
“Destiny 2” oyununda çatışmazlıqlardan danışsaq, ilk nəzərə çarpan eyni oyun xəritəsində oxşar tapşırıqların yerinə yetirilməsini qeyd etmək olar. Bu qənaətə gəlmək üçün oyunda təxminən 4-5 saat vaxt keçirmək bəs edir.
Hazırda “Destiny 2” özündə bir neçə ödənişli DLC ehtiva edir. Onları almaq məcburiyyətində olmasanız da, maddi durumunuz imkan verərsə oyun məzmunu genişləndirmək məqsədilə əldə edə bilərsiniz.
Yuxarı qeyd etdiyimiz digər oyunçularla qarşılıqlı əlaqəyə gəldikdə isə, bu oyun çərçivəsində heç bir əhəmiyyət kəsb etməsə belə dostlarla birlikdə məzəli və maraqlı anlar yaşamağa şərait yaradır
Sonda isə oyunu tək yox, dost və ya tanışlarınızla oynamağı tövsiyə edirik. Çünki, yalnız bu halda siz oyunun əsl potensialını üzə çıxara bilərsiniz.
