Marvel Studios tərəfindən ərsəyə gətirilən “WandaVision” serialı Marvel Film Dünyası ilə bilavasitə əlaqəlidir
Bu o deməkdir ki, “WandaVision” serialındakı superqəhrəmanlar və serialda cərəyan edən hadisələr Marvel Film Dünyasının ayrılmaz bir hissəsi kimi çıxış edir. Serialdakı hadisələr “Qisasçılar: Final” (Avangers: Endgame) filmindəki hadisələrdən az sonra cərəyan edir. Sözsüz ki, bu serialı filmin davamı da adlandırmaq olmaz. Çünki, əsas diqqət burada iki superqəhrəmana – Vanda (Wanda) və Vijna (Vision) ayrılıb.
Nəticədə belə qənaətə gəlmək olar ki, əgər siz Marvel komikslərinin, filmlərinin fanatı deyilsinizsə və ümumiyyətlə Marvel dünyası ilə maraqlanmırsınızsa, “WandaVision” serialından yan keçə bilərsiniz. Serial sıradan bir insanı cəlb edə biləcək heç bir şey təklif etmir.
Digər bir məsələ – əgər siz əksinə, Marvel dünyası ilə maraqlanırsınızsa, filmlərini izləyirsinizsə o zaman “WandaVision” serialı özünəməxsusluğu, sürprizləri və süjeti ilə sizi təəccübləndirəcək. Həm də unutmayaq ki, Marvel dünyasında bütün hadisələr bir-biri ilə əlaqələdir. Bu serialı izləməyəcəyiniz halda Marvel Film Dünyasına təsir edəcək əsas məqamları ötürə bilərsiniz.
Təsadüfi deyil ki, “WandaVision” serialı “IMDb” portalında 8.1 reytinq dəyəri ilə qiymətləndirilib.
“WandaVision” serialının müsbət cəhətləri
Yuxarıda qeyd etdiyimiz kimi, serialın süjet xəttində bir fanatı təəccübləndirə biləcək məqamlara rast gəlmək mümkündür. Serialın özünəməxsus rəng çalarları, dinamikası, dialoqların tempi və dəyişkənliyi izləyicini yormur və xoş təsir bağışlayır. “WandaVision” dram janrında olsa belə, yumoristik səhnələr kifayət qədərdir. Aktyorlar öz rollarını sözün həqiqi mənasında canlandırır, serialın dəyişkən məzmununa uyğun davranaraq yüksək peşəkarlıq nümayiş etdirirlər.
“WandaVision” serialının mənfi cəhətləri
İlk seriyalarda xronometraj olduqca qısadır. Bəzən bir seriya tam bir hadisəni kifayət qədər təsvir edə bilmir. Serialda hadisələr dinamik cərəyan etsə belə, seriyaların qısalığı sanki, ssenarinin kasad olduğu və bu səbəbdən süni olaraq növbəti seriya üçün uzadıldığı hissini yaradır. Yəqin düşünürsünüz ki, seriyaların qısa xronometrajda olması onların yalnız vacib hadisələrdən bəhs etdiyindən xəbər verir? Təəssüf ki, xeyr. “WandaVision” “mənasız” səhnələrə də vaxt ayırıb.
NƏTİCƏ
“WandaVision” serialının mənfi cəhətləri olsa da, onlar demək olar ki, əhəmiyyətsizdirlər. Əgər seriala baxmaq istəyiniz varsa, lakin qərarlaşa bilmirsinizsə bizdən sizə tövsiyə – mütləq izləyin!
