Apple 2021-ci ilin yaz təqdimatında yeni iMac, iPad Pro, AirTag və Apple TV cihazlarını təqdim etdi
Bu il Apple şirkətinin keçirdiyi yaz təqdimatı sözün əsl mənasında rəngarəng oldu. Tədbir zamanı ilk olaraq yenilənmiş Apple Card təqdim olundu. Bu kredit kartı vasitəsilə ailə daxilində xərclərin idarə olunması asanlaşacaq. Artıq 13 yaşdan yuxarı hər kəs yenilənmiş Apple Card Family kredit kartına sahib ola bilər. Sözsüz ki, bu məhsul Apple istifadəçiləri üçün aktualdır.
Apple Podcasts yeni və vizual olaraq daha rahat interfeysə keçid edir. Bununla yanaşı podkastlara ödənişli abunəlik imkanı əlavə olunur.
30 aprel tarixindən etibarən iPhone 12 mobil telefonunun bənövşəyi rəngi satışa buraxılacaq.
İlk dəfə AirTag cihazı təqdim olundu. Breloka bənzəyən yeni cihaz eynilə onun kimi fərqli əşyalara bərkidilə bilər. AirTag bərkidildiyi əşyaları qoşulu olduğu Apple cihazı vasitəsilə izləmək imkanı yaradır. Bir ədədinin qiyməti 29 ABŞ dolları, 4 ədədinin qiyməti isə 99 ABŞ dollarına bərabər olacaq. AirTag 23 apreldən satışa buraxılacaq.
TV OS əməliyyat sistemi və A12 prosessoru ilə təchiz olunmuş yeni Apple TV 4K cihazını həm öz pultu, həm də Apple smartfonu vasitəsilə idarə etmək mümkün olacaq. Məhsulun qiyməti 179 ABŞ dollarından başlayır. 30 aprel tarixindən etibarən öncədən sifariş etmək olacaq.
M1 mərkəzi prosessoru ilə təchiz olunmuş 24 diaqonal ölçülü 7 fərqli rəngdə yeni iMac təqdim olundu. Yeni iMac əvvəlkinə nisbətən daha nazik (11.5 mm) və səssiz olacaq. 4,5K retina displeyi ilə monitor istənilən görüntünü daha parlaq və detallı əks etdirə biləcək. Bütün bunlarla yanaşı yeni iMac 6 dinamik, Full HD veb-kamera, studiya mikrofonu keyfiyyətinə bərabər (şirkətin sözlərinə görə) mikrofonla təchiz olunub. Klaviatura, siçan və trekpad da iMac ilə eyni rənglərdə buraxılacaq. Yeni klaviaturanın üzərində Touch ID quraşdırılıb. 30 aprel tarixindən etibarən öncədən sifariş etmək olacaq.
Yeni iPad Pro M1 mərkəzi prosessoru və Mini LED texnologiyası ilə təchiz olunacaq. 128GB, 256GB, 512GB yaddaş həcmli iPad Pro 8GB RAM ilə, 1TB və 2TB yaddaş həcminə malik olan iPad Pro isə 16GB RAM ilə təchiz olunacaq. Cihaz həm də 5G şəbəkəsini, Xbox və PlayStation qeympadlarına qoşulmanı dəstəkləyəcək.
Apple şirkətinin 2021-ci il yaz təqdimatının tam formatda videosu:
