Epic Games şirkəti Apple şirkətini yenidən inhisarçılıqda ittiham edir
Bu dəfə Epic Games Avstraliyanın Rəqabət və İstehlakçı məsələləri üzrə Komissiyasına (ACCC – Australian Competition & Consumer Commission ing.) müraciət edib. Epic Games öz müraciətində Apple şirkətinin anti-inhisar davranışı ilə bağlı məsələni nəzərdən keçirməsini xahiş edib.
ACCC-yə ünvanlanmış müraciətdə Apple şirkətinin bazara məhdudiyyətsiz təsir gücünə malik olması və bunun avstraliyalı istehlakçılara əsaslı ziyan vura biləcəyi ilə bağlı fikirlər qeyd olunub.
Ötən il Epic Games şirkəti Apple şirkətini hər tətbiqdaxili alışdan tətbiq yaradıcılarını 30% komissiya ödəməyə vadar etməsi ilə bağlı məhkəməyə versə də, məsələ hələ baxılmamış saxlanılıb.
Qeyd edək ki, Epic Games əvvəllər də Apple şirkəti ilə oxşar məzmunlu məsələlərlə əlaqədar məhkəmə çəkişmələrində iştirak edib.
Ümumilikdə mübarizə Epic Games şirkətinin Apple və Google kimi şirkətlərin bazara təsiredici gücündən istifadə edərək inhisarçılıq siyasəti aparmasının qarşısını almaq prinsipi ilə başlayıb. Bu məqsədlə Epic Games 13.08.2020-ci il tarixində “Fortnite” oyununda mobil platformalar üçün tətbiqdaxili alışların AppStore və Google Play “nəzarətindən” kənar baş tutması üçün öz tətbiqini yeniləyir. Lakin, Apple və Google şirkətlərinin hər ikisi “Fortnite” oyununun mobil tətbiqini öz onlayn mağazalarından silir. Epic Games və Apple şirkətləri arasında davamlı mübahisə məhz bu andan etibarən daha da qlobal xarakter almağa başladı.
