Ceff Kili bu il “The Game Awards” mükafatlandırma mərasiminin 9 dekabr tarixində keçiriləcəyi barədə məlumat verib
2014-cü ildən etibarən hər il keçirilən “The Game Awards” mərasimində müxtəlif kateqoriyalar üzrə ən yaxşı oyunlar seçilərək mükafatlandırılır. Mərasim çərçivəsində həm də musiqi şousu, oyun studiyalarının nümayəndələrinin çıxışları keçirilir, yeni anons və treylerlər təqdim olunur.
Ənənəvi olaraq bu il də “The Game Awards” ilin sonuna təsadüf edir. Video-oyun sahəsində tanınmış jurnalist, tədbirin aparıcısı və təşkilatçılarından biri olan Ceff Kili rəsmi “Twitter” səhifəsində bu il mərasimin 9 dekabr tarixində keçiriləcəyi barədə məlumat paylaşıb və qısa videoanons təqdim edib.
Mərasim ABŞ-ın Los-Anceles şəhərində açıq formatda gələnlərin iştirakı ilə keçiriləcək. Eyni zamanda internetə çıxışı olan hər kəs mərasimi canlı yayımda izləyə biləcək.
