2008-ci ildən “Crash Bandicoot” oyun seriyasına hüquqları əldə edən Activision şirkəti 02.10.2020-ci il tarixdə ilk olaraq PlayStation 4 və Xbox One platformaları üçün buraxılmış “Crash Bandicoot 4” oyununun yeni nəsil platformalara inteqrasiya olunacağı barədə məlumat yayıb.
Bu ilin mart ayının 12-si oyun artıq yeni nəsil PlayStation 5 və Xbox Series X/S platformaları və Nintendo Switch üçün buraxılacaq. Oyunun hətta PC platforması üçün də buraxılacağı gözlənilir. PC platforması üçün dəqiq buraxılış tarixi elan olunmasa da il ərzində realizə olunacağı bildirilir.
Activision “Crash Bandicoot 4” oyununu PlayStation 4 və Xbox One konsollarında alanlara oyunu yeni nəsil konsollarda oyun kolleksiyasına pulsuz əlavə etmək imkanı yaradacaq. Belə ki, artıq oyunu olan şəxslər öz oyun proqresini də yeni konsollara keçirə biləcəklər. Xbox konsollarında bu proses avtomatlaşdırılsa da, PlayStation 5 sahibləri öz proqreslərini şəxsən “buluda” əlavə etməli olacaqlar.
1996-cı ildə ilk Sony PlayStation platforması üçün Naughty Dog (The Last of Us) studiyası tərəfindən buraxılan “Crash Bandicoot” 2000-ci illərdə Azərbaycanda mövcud olan bütün kompyuter klublarda sevilirdi. Mənim də bu oyunla tanışlığım məhz həmin dövrə təsadüf edir.
