COVID-19 koronavirus pandemiyası ilə əlaqədar olaraq “Elden Ring” oyunun buraxılış tarixi uzadılaraq artıq bir neçə dəfə yeni tarixə təyin olunub. İstehsalçı şirkət Bandai Namco Entertainment və yaradıcı şirkət FromSoftware tərəfindən 2017-ci ildən hazırlanan “Elden Ring” 2019-cu ildə “E3” sərgisində anons olunsa da bugünədək işıq üzü görməyib.
Bütün bunlara baxmayaraq hazırda oyun üzərində işlər gedir. Bu məqam öz təsdiqini oyunun internetə sızmış qeympley görüntülərində tapdı. Qeympley görüntüləri olduqca qısa və keyfiyyətsiz olsa da bəzi döyüş səhnələri diqqəti cəlb edir.
Yaradıcı şirkət FromSoftware öz oyunlarını oxşar tipdə ərsəyə gətirir. Müxtəlif platforma və portallarda gəzən məlumatlara görə “Elden Ring” özü də “Dark Souls like” oyun tipində olacaq. Sızmış qeympley görüntüləri də az olsa belə buna işarə edir.
Digər bir tərəfdən isə bu oyunun imkanlarının daha geniş olacağı və açıq dünyaya malik olacağı gözlənilir. Hər bir halda artıq 4 ildir hazırlanan “Elden Ring” oyunu şübhəsiz ki, böyük bir layihədir.
Son hadisələr “Elden Ring” oyununun qeympley treylerinin və ya qeympley elementlərini özündə əks etdirən bir neçə videoçarxın rəsmi mənbə tərəfindən yayımlanacağına işarə edir. Yuxarıdakı videoların isə oyunun qeympleyinə aid olduğu artıq təsdiqlənib.
