Rəssamlar üçün rəqəmsal platforma olan Kanada şirkəti ArtStation 30 aprel tarixində Epic Games şirkətinə birləşdi
Bu barədə məlumatı Epic Games və ArtStation şirkətləri rəsmi saytlarında paylaşıblar.
ArtStation 2013-cü ildən bugünədək müstəqil fəaliyyət göstərən rəqəmsal platformadır. Şirkət 2D və 3D formatda rəqəmsal rəsm çəkən rəssamlara həm bloq, həm də portfoliolarının təqdim olunması üçün unikal bir platforma təklif edir. İstifadəçilər üçün burada mövcud olan “Marketplace” onlayn mağazası vasitəsilə rəsmləri satışa çıxarmaq imkanı da mövcuddur.
Yeri gəlmişkən onu da qeyd edək ki, əvvəllər “Marketplace” hər satışdan 30% komissiya haqqı tuturdusa, Epic Games şirkətinə birləşdikdən sonra komissiya haqqı 12% təşkil edəcək. Bununla yanaşı rəqəmsal rəsm çəkməyə marağı olan və ya bu sahədə öz bacarıqlarını təkmilləşdirmək istəyən şəxslər üçün ArtStation daxilində mövcud olan “Learning” kursları və orada olan bütün materiallar bu ilin sonunadək ödənişsiz olacaq. Bu sahədə öz bilik və bacarıqlarını təkmilləşdirmək istəyən azərbaycanlılar üçün də bu əla şansdır.
Epic Games şirkətinə birləşməsinə baxmayaraq ArtStation öz fəaliyyətində əvvəlki kimi müstəqil olaraq qalacaq. Bu istiqamətdə ArtStation birgə layihələrin hazırlanması və digər sahələrdə Unreal Engine komandası ilə sıx əməkdaşlıq edəcək.
