28 may tarixində keçirilən təqdimat zamanı Ubisoft “Far Cry 6” oyununun buraxılış tarixini elan etdi və 2 yeni treyler təqdim etdi
Ubisoft şirkətinin Toronto studiyası tərəfindən ərsəyə gətirilən birinci şəxs perspektivli şuter (first-person shooter ing.) “Far Cry 6” 07.10.2021-ci il tarixində PC, PS4 / PS5, Xbox One / Xbox Series X|S platformaları üçün buraxılacaq. Yaradıcı studiya oyunun əvvəlki nəsil konsollar üçün yüksək səviyyədə optimallaşdırılacağını bildirib.
Təqdimat çərçivəsində təqdim olunan posterlərdən də bəlli olur ki, “Far Cry 6” oyununda seçimdən asılı olaraq baş qəhrəman həm qadın, həm də kişi personaj ola bilər. Personajın xarici görünüşünü və təchizatını ayarlamaq imkanı mövcuddur. Əvvəlki hissədən fərqli olaraq baş qəhrəman susmur, özü də dialoqlarda iştirak edir.
Yaradıcının sözlərinə görə oyunda hadisələr Kubada da cərəyan edə bilərdi. Lakin, Ubisoft oyuna siyasi motivlərin əlavə olunmamasına üstünlük verib. Beləliklə, studiya Yara adlı tamamilə yeni bir xəyali dövlət yaratmağa qərar verir.
“Far Cry 6” seriyanın digər hissələrindən geniş və zəngin ətraf mühitə malik oyun xəritəsi ilə seçilir. Qeympleyə gəldikdə isə, təqdim olunan treylerdən belə aydın olur ki, əsas personajın silah arsenalı kifayət qədər rəngarəngdir.
