“Injustice” cizgi filminin rəqəmsal surətləri 19 oktyabr tarixindən etibarən satışa buraxılacaq
DC kainatının eyniadlı komiks və oyun seriyasına əsaslanan “Injustice” cizgi filminin ilk treyleri təqdim olunub. Cizgi filmində də komiks və oyundakı hadisələr bir daha işıqlandırılır. Bu seriya haqqında məlumatı olan hər kəs artıq az-çox süjetin nədən bəhs edəcəyindən xəbərdardır. Təəssüf ki, cizgi filminin hələ buraxılmadığı üçün qarışıq “Injustice” süjetinin nə dərəcədə əlaqəli və dolğun təsvir olunduğu barədə, hələ ki, sizə məlumat verə bilməyəcəyik.
Supermenin sevdiyi Loys Leyni qaçıran Coker bu dəfə öz əməlləri ilə bütün sərhədləri aşır. O, hamilə vəziyyətdə olan Loys Leyni öldürür və Supermenin məskunlaşdığı Metropolis şəhərinin böyük bir hissəsini partlayış nəticəsində dağıntılara çevirir. Bütün bu əməllərdən təngə gələn Supermen təmiz qəlbli superqəhrəmandan qəddar bir tirana çevrilir. Artıq, o, daha sərt və öz yeni baxışlarına uyğun metodlarla ədalət mühakiməsi həyata keçirməyə başlayır. Betmen və digər qəhrəmanlar isə tamamilə nəzarətdən çıxmış Supermenin qarşısını almağa çalışırlar.
Təqdim olunun ilk treyler süjetin bir neçə əsas məqamını özündə cəmləşdirir və cizgi filmi haqqında ilkin fikir formalaşdırmaq üçün kifayət edir.
