5 dekabr Bakı vaxtı ilə saat 01:00-da 2-ci bölümün başa çatması münasibətilə “Fortnite” oyununda “Final” tədbiri keçiriləcək
2017-ci il tarixində Epic Games tərəfindən ərsəyə gətirilən “Fortnite” oyunu əsasən “battle royale” janrı ilə məşhurlaşıb. Bizi “Twitch” kanalımızda izləyən hər kəs son iki sezonda cərəyan edən hadisələrin və oyun dünyasında təşkil olunan tədbirlərin şahidi olub. Hazırda “Fortnite” 2-ci bölümünün 8-ci və sonuncu sezonundadır. Sezonun başa çatmasına isə sayılı günlər qalıb. Belə ki, Epic Games şirkətinin rəsmi saytında verilən məlumata görə 8-ci sezon 5 dekabr tarixində Bakı vaxtı ilə saat 01:00-a təyin olunmuş “Final” (The End ing.) tədbiri ilə başa çatacaq.
“Final” tədbirində iştirak etmək üçün tədbir başlamazdan 30 dəqiqə əvvəl (saat 00:30-da) oyuna daxil olmaq tövsiyə olunur. İştirak edən oyunçular 16 nəfərdən ibarət qruplara bölünəcək. Tədbir çərçivisində oyunçular adanın “Kub Kraliçası” tərəfindən tamamilə məhv olunmasının qarşısını almağa çalışmalıdırlar. Hazırda oyunun “battle royale” rejiminə daxil olan hər kəs “Kub Kraliçası”nı oyun xəritəsinin ortasında yerləşən piramidada görə bilər.
Qeyd edək ki, sezonun son günlərində oyunçuları xeyli güzəştlər gözləyir. Belə ki, 5 dekabr tarixinədək oyuna daxil olan hər kəs əlavə 225.000 EXP əldə edəcək. 27 noyabr Bakı vaxtı ilə saat 04:00-dan 29 noyabr saat 16:00-dək güzəştli EXP şərtləri tətbiq olunacaq. Eləcə də 30 noyabr tarixində 18:00-dan etibarən qızıl külçələrini oyundaxili xidmətlərə və ekzotik əşyalara dəyişmək olacaq.
