Bu il “Gamesom” sərgisinin açılış mərasimi 25 avqust Bakı vaxtı ilə saat 22:00-da başlayacaq.
Artıq bir neçə gündən sonra – 25 avqust tarixində ilin ən gözlənilən oyun tədbirlərindən biri olan “gamescom” sərgisinin açılışı mərasimi keçiriləcək. Açılış mərasiminə 30 dəqiqə qalmış isə preşou başlayacaq. Sözsüz ki, hər kəs bu sərgini canlı yayımda izləyə biləcək.
Açılış mərasimində 30-dan çox fərqli oyunun nümayiş olunacağı gözlənilir. Belə ki, bu siyahıya həm yeni, həm də əvvəllər artıq anons olunmuş oyunlar daxildir.
Sərginin başlamasına bir neçə gün qalmış “gamescom” təşkilatçıları tərəfindən reklam xarakterli videoçarx hazırlanıb. Videoçarx sərgidə təqdim olunacaq bütün oyunları özündə əks etdirməsə də, ən əsas və böyük layihələri özündə cəmləşdirib. Buraya yenicə anons olunmuş “Call of Duty: Vanguard”, “Death Stranding Director’s Cut”, “Psychonauts 2”, “Far Cry 6”, “The Dark Pictures Anthology: House of Ashes”, “LEGO Star Wars: The Skywalker Saga”, “Ninja Turtles” və digər oyunlar daxildir.
