Məşhur “Game of Thrones”un prikveli “House of the Dragon” serialının çəkilişlərinə 26 aprel tarixindən başlanılıb
Yazıçı Corc Martinin “Buz və Atəşin nəğməsi” romanı əsasında “HBO” tərəfindən ərsəyə gətirilən və 2011-ci ildən 2019-cu il tarixinədək yayımlanan “Game of Thrones” (“Taxt-tac Oyunları” azərb.) serialı qısa müddət ərzində milyonlarla izləyici cəlb edə bilmişdi. Məhz buna görə də dünyada ən baxımlı seriallardan biri olan “Taxt-tac Oyunları”nın prikvelinin ərsəyə gətirilməsi heç də təsadüfi deyil. Hələ 2019-cu ildə bu əhvalatla bağlı daha iki serialın çəkiləcəyi barədə internetdə məlumatlar dolaşırdı. Nəhayət ki, gözlənilən an gəlib çatdı. 26 aprel tarixində “House of the Dragon” (“Əjdahanın Evi” azərb.) serialının rəsmi Twitter hesabı çəkilişlərin başlanması barədə məlumat paylaşıb.
Əgər siz “Taxt-tac Oyunları” serialını izləmisinizsə, yəqin ki, prikvelin Tarqarienlərlə bağlı olacağını artıq adından anlamısınız. “House of the Dragon” serialında cərəyan edəcək hadisələr “Taxt-tac Oyunları”ndan 300 il əvvələ qayıdır. Rejissorluq kürsüsü Migel Sapoçnikə həvalə olunub.
Hazırda serialın aktyor heyətinə aşağıdakılar daxildir:
- İv Best – Şahzadə Reynis Velarion
- Peddi Konsidayn – Vizeris Tarqarien
- Oliviya Kuk – Alisent Haytauer
- Emma D’Arsi – Reynira Tarqarien
- Fabien Frankel – Kriston Kol
- Ris Ivans – Otto Haytauer
- Sonoya Mizuno – Mizaria
- Mett Smit – Daymon Tarqarien
- Stiv Tussen – Lord Korlis Velarion
Qeyd edək ki, HBO serialın 1-ci sezonunun premyerasını 2022-ci il tarixinə planlaşdırıb.
