İndiana Cons film seriyasının növbəti hissəsinin premyerası 29 iyul 2022-ci il tarixinə təyin olunub.
Seriyanın sonuncu “Indiana Jones and the Kingdom of the Crystal Skull” filminin premyerası 2008-ci il tarixində baş tutmuşdu. Sanki elə dünən izlədiyimiz yeni filmin premyerasından artıq 13 il ötür. XX əsrin 80-90-cı illərinin və XXI əsrin əvvəllərinin ən sevilən film seriyalarından biri olan “İndiana Cons” uzun fasilədən sonra ekranlarımıza geri dönür.
Film seriyasının 5-ci hissəsinin çəkilişlərinin 7 iyun tarixindən Böyük Britaniyada başlanacağı ehtimal olunur. Premyera isə 29 iyul 2022-ci il tarixinə təyin olunub. Baş qəhrəman İndiana Cons obrazını yenidən aktyor Harrison Ford canlandıracaq. Onunla yanaşı filmin aktyor və aktrisa heyətində Mads Mikkelsen, Fibi Uoller-Bric, Boyd Holbruk, Şonett Rene Uilson və Tomas Kreçman yer alır.
Bu dəfə filmin rejissoru Stiven Spilberq yox, Ceyms Menqolddur. Lakin Stiven Spilberq icraçı prodüser kimi filmin çəkilişlərinə öz töhfəsini verəcək.
