“İntiharçılar Dəstəsi” (The Suicide Squad ing.) filminin premyerası 5 avqust tarixinə planlaşdırılıb
Warner Bros. və DC Films film şirkətləri tərəfindən ərsəyə gətirilən “İntiharçılar Dəstəsi” 2016-cı ildə buraxılan “İntiharçılar Dəstəsi” filminin davamıdır. İngilis dilində birinci (Suicide Squad) və ikinci hissənin (The Suicide Squad) adı cüzi də olsa fərqlənir. Azərbaycan dilinə tərcümədə isə hər iki ad “İntiharçılar Dəstəsi” olaraq qalır. Yerli tərcüməçilər filmin adını rəsmi olaraq Azərbaycan dilinə tərcümə edənədək biz ikinci hissəni “İntiharçılar Dəstəsi (2021)” adlandıracağıq.
Filmin rejissoru Marvel Kinemotoqrafiyası Kainatındakı “Qalaktika Mühafizəçiləri” (Guardians of the Galaxy ing.) film seriyasının müəllifi Ceyms Qanndır. Bu filmdə də təhlükənin qarşısının alınması üçün bir qrup DC komikslərinin caniləri vahid məqsədlə bir araya gətirilirlər. Lakin, treylerdən məlum olur ki, əvvəlki hissəyə nisbətən bu film daha yumoristik olacaq. Eləcə də, bəzi qanlı səhnələr “İntiharçılar Dəstəsi (2021)” filminin “R” reytinqində olacağına işarə edir.
“İntiharçılar Dəstəsi (2021)” filmi 05.08.2021-ci il tarixində kinoteatrlarda və HBO Max servisində yayımlanacaq. İlk treyleri sizə təqdim edirik:
