Amazon və Electronic Arts “Mass Effect” kainatına əsaslanan serialın çəkilməsi üçün danışıqlara başlayıb
Deadline xəbər portalının verdiyi məlumata görə Amazon Studios “Mass Effect” oyun seriyasının kainatına əsaslanan serial çəkmək niyyətindədir. Mənbə qeyd edir ki, Amazon və Electronic Arts serialın çəkilməsi üçün razılıq əldə etmək üzrədirlər. Təəssüf ki, iki şirkət arasında davam edən danışıqların yekunu və serialın hansı formatda olacağı barədə hələlik heç bir məlumat yoxdur.
Elmi fantastik rol oyunu və üçüncü şəxs perspektivli şuter janrlarında olan “Mass Effect” oyun seriyası BioWare və Electronic Arts tərəfindən ərsəyə gətirilib. Seriyanın ilk hissəsi 2007-ci ildə buraxılıb və oyun sənayesində janrın klassik oyunlarından biri hesab olunur.
Xatırladaq ki, hazırda BioWare yeni “Dragon Age” oyunu ilə yanaşı “Mass Effect” seriyasının növbəti hissəsi üzərində də çalışır. Buna baxmayaraq oyunun yaxın bir neçə il ərzində buraxılacağı gözlənilmir.
