BioWare buraxılışına tam bir ay qalmış “Mass Effect Legendary Edition” oyun toplusunun orjinal trilogiya ilə müqayisəli videoçarxını təqdim edib. Videoçarxda hər bir oyunun ilkin versiyasına nisbətən necə dəyişdiyi əyani şəkildə təsvir olunub.
“Mass Effect Legendary Edition” haqda yazdığımız əvvəlki məqalədə paylaşdığımız müqayisəli şəkillər müxtəlif internet resurslarında seriya həvəskarları tərəfindən tənqid olunmuşdu. Belə ki, tənqid edənlərin böyük hissəsi orjinal oyundan olan görüntülərə yalnız işıq effektlərinin əlavə olunduğunu istehza ilə qeyd edirdilər.
Təqdim olunan videoçarxdan isə məlum olur ki, BioWare trilogiyanın təkmilləşdirilməsi üçün həqiqətən də az əmək sərf etməmişdir. Sözsüz ki, ən çox dəyişikliyə məruz qalan “Mass Effect” oyun seriyasının birinci hissəsidir. Bu ən azı birinci hissənin seriyadan olan digər oyunlarla müqayisədə daha əvvəl buraxıldığı ilə izah olunur. Remasterdə əsasən oyun qrafikasının mühüm elementlərindən biri olan teksturalar təkmilləşdirilərək müasir tələblərə uyğunlaşdırılmışdır.
Xatırladaq ki, sözügedən oyun toplusu 14 may tarixində PC və konsollar üçün buraxılacaq.
Mass Effect Legendary Edition oyununun orjinal trilogiya ilə müqayisəli videoçarxını təqdim edirik:
