Nvidia şirkəti Geforce seriyasının yeni RTX 3070 Ti və RTX 3080 Ti videokartlarını Computex 2021 sərgisində təqdim edib
Bu gün “Computex 2021” sərgisi çərçivəsində Nvidia Geforce 30 seriyasının daha iki təkmilləşdirilmiş videokartını təqdim edib. Söhbət RTX 3070 Ti və RTX 3080 Ti videokartlarından gedir. Nvidia şirkətinin verdiyi rəsmi məlumata görə RTX 3080 Ti videokartı 3 iyun, RTX 3070 Ti videokartı isə 10 iyun tarixindən satışa buraxılacaq. Həmin videokartların Azərbaycan bazarına nə zaman gələcəyi isə hələ məlum deyil. Çox güman ki, yeni videokartlar artıq bir aydan sonra mağaza rəflərində öz yerini tutacaqlar.
Nvidia Geforce RTX 3070 Ti
10 iyun tarixində satışa buraxılacaq RTX 3070 Ti videokartının rəsmi qiyməti 599 ABŞ dollarıdır. Şirkətin sözlərinə görə 8 GB GDDR6X videoyaddaşla təchiz olunan bu videokart Geforce RTX 2070 SUPER videokartından 1.5 dəfə daha sürətlidir.
Nvidia Geforce RTX 3080 Ti
Nvidia 3 iyun tarixində 1199 ABŞ dollarına satışa buraxacağı Geforce RTX 3080 Ti videokartını öz oyun flaqmanı adlandırır. Görünür sınaq zamanı RTX 3080 Ti digər Nvidia videokartları ilə müqayisədə oyunlarda daha yaxşı nəticələr göstərib. Bu videokart 12 GB GDDR6X videoyaddaşla təchiz olunub və RTX 2080 Ti videokartından 1.5 dəfə daha sürətlidir.
Əlbəttə ki, ənənəvi olaraq Nvidia ən çox videoyaddaş tələb edən müasir oyunlarda öz videokartlarının müxtəlif ayarlar üzrə müqayisəli performans qrafiklərini təqdim edib.
Geforce RTX 3070 Ti 
Geforce RTX 3080 Ti
Təqdim olunan hər iki qrafikdə göstəricilər təxmini eyni olsa belə, həqiqətən də, hər iki videokartın əvvəlki videokart seriyasından 1.5 dəfə və daha çox sürətli olduğu aydın görünür.
