“Short Nite” qısametrajlı cizgi filmləri festivalı 12 may Bakı vaxtı ilə saat 22:00-da başlayacaq və 16 may tarixinədək davam edəcək.
Epic Games “Fortnite” çərçivəsində keçirilən növbəti qısametrajlı cizgi filmləri festivalını anons edib. Xatırlayırsınızsa, bir müddət əvvəl biz buna bənzər festivalda iştirak edib onu canlı yayımda sizə təqdim etmişdik. Festival həmişə olduğu kimi “Short Nite” adlanır və özündə bir neçə qısametrajlı animasiyanı ehtiva edir.
Cizgi filmi həvəskarları bu festivalda artıq tanıdığı qəhrəmanlarla yanaşı, yeni obrazlar da görəcəklər. Festivalda yayımlanacaq qısametrajlı animasiyaların tam sayı açıqlanmasa da, onlardan üçünün ilk dəfə “Fortnite” oyununda təqdim olunacağı məlumdur.
12 may Bakı vaxtı ilə saat 22:00-dan başlayaraq 16 may tarixinədək davam edəcək “Short Nite” festivalına bizimlə birlikdə də qoşula bilərsiniz. Bunun üçün icmamızın qeydiyyatdan keçdiyi sosial şəbəkələrdən birində və ya elə saytımızın “Bizimlə Əlaqə” bölməsindən bizə yaza bilərsiniz.
