Sentyabrda PS Plus abunəsinə “Overcooked! All You Can Eat”, “HITMAN 2” və “Predator: Hunting Grounds” oyunlarının daxil olacağı barədə məlumat sızıb
Hər ay olduğu kimi bu dəfə də PS Plus abunəçiləri xidmətin üstünlüklərindən istifadə edərək növbəti 3 oyunu öz oyun kolleksiyalarına tamamilə ödənişsiz əldə edə biləcəklər. Artıq abunəyə daxil olan oyunların adlarının vaxtından əvvəl şəbəkəyə sızması, demək olar ki, adi bir hal alıb. Lakin bu növ qeyri-rəsmi məlumatlar həqiqəti tam əks etdirməyə də bilər. Odur ki, belə xəbərlərə əsaslanarkən oxuyucularımızı diqqətli olmağa çağırırıq.
QEYD: Sentyabr ayında PS Plus abunəsinə daxil olan oyunların adları ənənəvi olaraq ayın ilk günündə rəsmi elan olunacaq.
Şəbəkəyə sızan məlumata əsasən gələn ayın abunəsinə PlayStation 4 konsolu üçün 2, PlayStation 5 konsolu üçün isə 1 oyun daxildir. Aşağıda adları qeyd olunan oyunları 07.09.2021-ci il tarixindən 05.10.2021-ci il tarixədək əldə etmək mümkün olacaq:
- Overcooked! All You Can Eat – PlayStation 5
- HITMAN 2 – PlayStation 4
- Predator: Hunting Grounds – PlayStation 4
Overcooked! All You Can Eat
Oyun Ghost Town Games və Team17 Digital tərəfindən ərsəyə gətirilib. İlk dəfə 2020-ci ilin noyabr ayında Xbox Series X|S və PlayStation 5 konsolları üçün buraxılıb. Daha sonra növbəti ilin mart ayında PC, PS4, Xbox One və Nintendo Switch platformaları üçün buraxılıb.
Eyni zamanda həm diqqət, həm də cəldlik tələb edən “Overcooked! All You Can Eat” tanışlarla birgə əyləncəli vaxt keçirmək üçün əla vasitədir.
HITMAN 2
IO Interactive tərəfindən ərsəyə gətirilən “HITMAN” trilogiyasının 2-ci hissəsi 2018-ci ildə PC, PS4 və Xbox One platformaları üçün buraxılıb. Oyun stels (gizli oyun) janrındadır.
Predator: Hunting Grounds
Birinci şəxs perspektivli şuter “Predator: Hunting Grounds” IIIFonic tərəfindən 2020-ci il tarixində PC və PS4 platformaları üçün ərsəyə gətirilib. Oyun yalnız çox nəfərlik onlayn rejimi dəstəkləyir.
