Assassin’s Creed seriyasının gələcəyi Assassin’s Creed Infinity layihəsi olacaq
Dünən Ubisoft şirkəti “Assassin’s Creed Infinity” layihəsi barədə rəsmi məlumat paylaşmamışdan öncə artıq bəzi xarici KİV Ubisoft şirkətinin yeni layihə üzərində çalışdığı barədə yazmışdılar. Yeni “Assassin’s Creed Infinty” layihəsi üzərində Ubisoft şirkətinin Montreal və Quebec studiyaları çalışır. Hazırda layihə ilkin hazırlanma mərhələsindədir.
Xatırladaq ki, “Assassin’s Creed” seriyasının son iki oyunu məhz Montreal (Assassin’s Creed Valhalla) və Quebec (Assassin’s Creed Odyssey) studiyaları tərəfindən ərsəyə gətirilib.
Ubisoft şirkətinin paylaşdığı məlumata görə “Assassin’s Creed Infinity” bu oyun seriyasının mahiyyətini kökündən dəyişəcək. Belə bir addım atmaqda səbəb isə “Assassin’s Creed Valhalla” və “Assassin’s Creed Odyssey” oyunlarının rekord göstəricilərə sahib olması və şirkətin oyunçu kütləsinin rəyləri əsasında onların məmnunluğunu təmin etmək istəyidir.
Bəs “Assassin’s Creed Infinity” nədir?
“Assassin’s Creed Infinity” layihənin işçi və ya kod adıdır. Yəni gələcəkdə bu ad, çox güman ki, dəyişəcək.
Ubisoft şirkəti yeni anons etdiyi layihəsi barədə gələcəkdə daha ətraflı məlumat verəcəyini bildirib. Hazırda bəzi mənbələr bu layihənin seriyanın növbəti oyunu olacağını, bəziləri isə seriyanın gələcək oyunları üçün bir platforma olacağı barədə yazırlar.
Birinci versiyaya görə “Assassin’s Creed Infinity” də “Fortnite” və “GTA Online” kimi uzunmüddətli dəstəklənmə perspektivinə malik oyun olacaq. Yəni oyun buraxıldıqdan sonra hələ bir neçə il vaxtaşırı əlavə məzmunla yenilənəcək.
İkinci versiyaya görə isə “Assassin’s Creed Infinity” platforması əsasında Ubisoft Montreal və Ubisoft Quebec studiyaları tərəfindən seriyanın gələcək oyunları işlənib hazırlanacaq.
Hər bir halda bu layihənin 2024-cü ildən tez ərsəyə gəlməyəcəyi güman olunur.
