“Payday 3” oyununun istehsalçı şirkəti Koch Media olacaq
Starbreeze şirkəti tərəfindən ərsəyə gətirilən “Payday” oyun seriyası birinci şəxs perspektivli kooperativ şuterdir (first-person co-op shooter ing.). Ümumilikdə oyun seriyasının əsas məzmunu müxtəlif üsullarla obyektlərə basqın edərək quldurluq etməkdən ibarətdir. Seriyanın birinci hissəsi 2011-ci il tarixində buraxılmış “Payday: The Heist” oyunudur. “Payday 2” adlanan ikinci hissə isə çox gözləmədən 2013-cü ildə buraxılmışdı. Lakin, seriyanın davamı olan “Payday 3” oyununun buraxılışı müxtəlif səbəblərdən bu günədək uzanmışdı. Sözsüz ki, xəbərin başlığından aydın olduğu kimi əsas səbəblərdən biri ortaq istehsalçı şirkətin olmaması idi.
Çoxlarının “Metro”, “Risen”, “Dead Island”, “Homefront” və s. oyun seriyalarından tanıdığı Deep Silver şirkəti də, məhz Koch Media şirkətinin törəməsidir. “Payday 3” oyununun ortaq istehsalçı şirkəti olması barədə xəbəri Koch Media rəsmi Twitter hesabında da paylaşıb.
Rəsmi mənbələrin verdiyi məlumata görə ümumilikdə 50 milyon avrodan çox investisiya olunan layihə artıq tam maliyyələşib. “Payday 3” 2023-cü il tarixində PC və konsollar üçün Unreal Engine oyun mühərrikində buraxılacaq.
