“Evdə oyna” aksiyası mart ayının 1-dən başlayaraq iyun ayınadək davam edəcək
PlayStation əvvəllər də dünya üzərinə çökən koronavirus pandemiyası ilə əlaqədar olaraq “Evdə oyna” (Play At Home ing.) şüarı ilə konsol sahiblərini pulsuz paylaşdığı oyunları ilə sevindirmişdi. “Evdə oyna” aksiyası koronavirus pandemiyası ilə əlaqədar özünü cəmiyyətdən təcrid etmək məcburiyyətdində qalan şəxslərə dəstək məqsədi daşıyır. Lakin, buna baxmayaraq pandemiya qlobal xarakter daşıdığından bütün konsol sahibləri bundan yararlana bilər.
Aksiya çərçivəsində mart ayının 1-dən 31-dək ödənişsiz əldə edə biləcəyiniz ilk oyun 2016-cı il tarixdə buraxılan “Ratchet & Clank” oyunu olacaq. Oyunu şəxsi hesabınızda PlayStation oyun kolleksiyasına əlavə etdikdən sonra, o, həmişəlik sizə məxsus olacaq.
Rəsmi PlayStation bloqunda paylaşılan məlumata görə aksiya çərçivəsində “Ratchet və Clank” oyunu ilə yanaşı 25 mart tarixindən etibarən konsol sahiblərinə “Wakanim” və “Funimation” anime servislərində abunəliklə əlaqədar xüsusi təkliflər olacaq. Lakin sözügedən servislərin heç birinin əhatə dairəsinə Azərbaycan Respublikası daxil deyil.
Şirkət “Evdə oyna” aksiyası çərçivəsində daha bir neçə oyunu pulsuz paylaşacağını planlaşdırır. Gələcəkdə bu barədə məlumatları biz də sizinlə paylaşacayıq.
