Feudal Baron: King’s Land strategiya janrındadır. Oyunun buraxılış tarixi isə hələ elan olunmayıb.
Simulyator janrında “Orchard Simultar” və “Trapper Simulator” kimi oyunlar ərsəyə gətirən Sim Farm studiyasının növbəti anonsu strategiya janrında olan “Feudal Baron: King’s Land” oldu. Adından da bəlli olduğu kimi yeni strategiyada hadisələr orta əsrlərdə feodalizm dövründə cərəyan edir. Oyunun imkanlarında istifadə edərək oyunçular onlara təhkim olunan ərazini genişləndirməli və inkişaf etdirməlidirlər. Bunun üçün isə oyunda, sözsüz ki, müxtəlif növ binaların tikintisi, eləcə də resursların əldə olunması üçün alətlər mövcuddur. Əsas resurs isə qızıl hesab olunur.
Bütün bunlarla yanaşı “Feudal Baron: King’s Land” oyununda oyunçu tərəfindən yaradılan feodal malikənasində vergi sistemini tənzimləmək və digər feodallarla ticarət əlaqələri qurmaq imkanı mövcuddur.
Əlbəttə ki, sadalananları həyata keçirmək bir o qədər də asan olmayacaq. İstənilən oyunda və xüsusilə də strategiya janrında olduğu kimi, bu oyunda da oyunçunun qarşısında müəyyən maneələr olacaq. Hər şey oyunçunun yürütdüyü siyasətdən asılıdır. Tabeçiliyinizdə olan insanlar arasında xəstəlik yayılarsa, onun vaxtında qarşısını almaq, qonşu feodallarla yaxşı münasibətlər qurmaq və daxili siyasətdə mümkün qədər mülayim olmaq lazımdır. Əks təqdirdə epidemiya, uğursuz müharibə və üsyan oyunun sonuna səbəb ola bilər.
“Feudal Baron: King’s Land” oyununu artıq Steam rəqəmsal mağazasında “wishlist”ə əlavə etmək mümkündür.
