“Spider-man: No Way Home” filminin premyerası 17 dekabr 2021-ci il tarixinə təyin olunub.
Nəhayət ki, Sony şirkəti bütün Marvel Kinematoqrafiya Kainatı və komikslərinin həvəskarlarını və əsasən də Hörümçək-adam superqəhrəmanını sevənləri sevindirdi. Bu gün “Spider-man: No Way Home” (Hörümçək-adam: Evə Yol Yoxdur azərb.) filminin ilk tizer treyleri təqdim olundu.
Baxmayaraq ki, Hörümçək-adam haqqında növbəti filmlə əlaqədar şəbəkəyə kifayət qədər məlumat sızmışdı, treyler hər kəsi təəccübləndirməyi bacardı. Əlbəttə ki, rəsmi treylerin təqdim olunması ilə eyni zamanda şəbəkəyə sızmış bir çox məlumatlar da öz təsdiqini tapmış oldu.
Ən əsası isə odur ki, yeni filmdə Hörümçək-adamı seriyanın digər filmləri ilə müqayisədə daha çətin sınaqlar, təhlükəli rəqiblər və nəhayət ki, artıq uzun müddətir ki, Marvel tərəfindən tizer olunan multikainat gözləyir! Belə ki, “Spider-man: Far From Home” filmini izləyən hər kəs Misterionun qurduğu tələnin ucbatından Hörümçək-adamın şəxsiyyətinin bütün dünyaya məlum olmasından xəbərdardır. Növbəti filmdə də, hadisələr məhz bu süjet elementi üzərində qurulub. Daha şəxsiyyətini gizləyə bilməyən Piter Parker vəziyyətdən çıxmaq üçün Doktor Streyncə müraciət etməli olur. Çünki, nəinki o özü, hətta onun yaxınları belə artıq təhlükə altındadır. Doktor Streyc öz sehri ilə yalnız hər kəsin şüurundan Hörümçək-adamın şəxsiyyətini silmək niyyətində olsa da, kainatlar bir-birinə qarışır. Nəticədə də hər kəsin Doktor Osminoq kimi tanıdığı aktyor Alfred Molina və Yaşıl Qoblin meydana gəlir. Onların bu filmdə necə meydana gəlməsi təfərrüatları ilə açıqlanmasa da, “Doktor Osminoq” obrazı tam, “Yaşıl Qoblin” isə yalnız partladıcı qurğusu ilə treylerdə əks olunub.
“Spider-man: No Way Home” filminin Azərbaycan dilində altyazılı treylerini təqdim edirik:
