Google Stadia oyun dünyasını dəyişəcək!

2019-cu ilin mart ayının 19-da GDC 2019 konfransında Google şirkəti “Stadia” adlanan yeni, analoqu olmayan, inanılmaz bir oyun servisi təqdim etdi. Bu servis vasitəsilə artıq heç bir platformaya ehtiyac duyulmadan yalnız Google brauzer vasitəsilə servis tərəfindən dəstəklənən istənilən oyunu oynamaq olar! Artıq oyunu PC-yə və ya hər hansı digər bir platformaya yükləməyə ehtiyac yoxdur. Bu servis vasitəsilə tələb olunan yalnız brauzer və internet qoşulmasıdır. Oyun zamanı bütün proseslər Google serverlərində gedəcək və siz nəticədə öz monitorlarınızda oynamaq istədiyiniz oyunu söz verilən optimal ayarlarla oynayaraq həzz ala biləcəksiniz. Google söz verir ki, Stadia 4K ayarında 60FPS rahatlıqla təmin edə biləcək və sizin artıq bunun üçün PS4 və Xbox One kimi konsollara sahib olmağınıza ehtiyac belə yoxdur. Google gələcəkdə oyunların 8K ayarında 125 FPS-lə oynanıla biləcəyini də qeyd edir. İnternet vasitəsilə bu servisdən yararlanmaq üçün sizin internetinizin təxminən 25 mbit/s ötürmə qabiliyyəti olmalıdır. Beləliklə, əgər siz qeyd olunanlara sahibsinizsə, o zaman Google Stadia vasitəsilə siz brauzer vasitəsilə mobil telefonunuzda, planşetdə hətta brauzeri dəstəkləyən televizorlarda belə Google Stadia servisinin dəstəklədiyi istənilən oyunu oynaya biləcəksiniz!

Bütün bunlarla yanaşı Google Stadia bu servisə məxsus yeni gamepad (oyun kontrolleri) təqdim etdi və görünüşdən bu kontrellerin Xbox və Playstation kontrollerinin bir kombinasiyası olduğunu müşahidə edə bilərik. Google Stadia gamepad minimalistik dizaynla təchiz olunub və ilk görünüşdən istifadəsi üçün çox rahat görünür.

Artıq bir çox oyun şirkətləri onlarla əməkdaşlıq edir və etməyə hazırdır. Bu fakt isə sözügedən layihənin artıq unikal bir başlanğıca malik olduğunun bariz nümunəsidir. Bu servisin təklif etdiyi imkanlar bununla bitmir. Artıq YouTube vasitəsilə hər hansı bir oyunun rəsmi treylerini izləyən zaman belə bu servis elə videodan həmin oyuna keçmək imkanını, eləcədə məhşur strimerlər oynayan zaman onlara qoşulmaq imkanını reallaşdıracaq.

Google Stadia-nın fəaliyyətə başlama tarixi tam dəqiq olmasa belə, artıq 2019-cu ildə bu servsisin start götürəcəyi bəllidir. İlk əvvəl Google Stadia servisi ABŞ, Kanada, Yaponiya və bir sıra Avropa ölkələrində fəaliyyətə başlayacaq.