Sony bu məlumatı keçirdiyi təqdimat zamanı lövhələrdən birində əks etdirib
Sony 27 may tarixində investorlar üçün nəzərdə tutulan təqdimat keçirib. Təqdimat zamanı PlayStation platforması ilə əlaqədar maraqlı məlumatlar paylaşılıb. Sony şirkətinin təqdim etdiyi statistikaya əsasən PlayStation 5 konsolu əvvəlki nəsil konsollarla müqayisədə satışlara daha uğurlu başlayıb.
PlayStation Plus servisinin abunəçilərinin ildən ilə daha da artması və ümumilikdə 75% istifadəçisinin servisdən məmnun qalması haqda lövhə təqdim olunub.
Sözsüz ki, bütün bu lövhələr arasında ən çox diqqət çəkəni “Days Gone” oyununun ardı ilə “Uncharted 4” oyununun da PC üçün buraxılacağının planlaşdırılması barədə məlumatı əks etdirən lövhədir. Sony PC platformasına buraxılan “Horizon Zero Down” oyununun dəyərinin 250% ödənməsini qeyd edib. Bu satışlardan məmnun qalan şirkət digər eksklüziv oyunların da gələcək də PC üçün buraxılacağını planlaşdırır. Görünür növbəti oyun məhz “Uncharted 4: A Thief’s End” olacaq.
Bütün bunlara baxmayaraq “Uncharted 4: A Thief’s End” oyunu hələ ki, PC platforması üçün rəsmi anons olunmayıb. Əgər Sony şirkətinin həqiqətən də belə planları varsa, o zaman yaxın zamanda yeni anons eşidəcəyik.
Xatırladaq ki, “Uncharted 4: A Thief’s End” oyunu 2016-cı ildə yalnız PlayStation 4 üçün buraxılıb. Oyun kritiklər və oyunçular tərəfindən yüksək qiymətləndirilib.
