“Witcher” serialının 2-ci sezonu bu il 17 dekabrdan etibarən “Netflix” servisində yayımlanmağa başlayacaq
“Netflix” tərəfindən çəkilən və polşalı yazıçı Sapkovskinin eyniadlı roman toplusuna əsaslanan “Withcer” serialının 2-ci sezonunun dünən yeni treyleri təqdim olunub. Adətən film şirkətləri treylerlərdə ən parlaq səhnələri təqdim etməklə kifayətlənir. Lakin bu dəfə treyler ənənəvi səhnələrlə yanaşı, həm də 2-ci sezonun nədən bəhs edəcəyi ilə əlaqədar izləyicilərə qısa giriş verir. Gəlin, əvvəl treyleri izləyək:
Yeni treylerin rep musiqisi ilə müşayiət olunması bəzilərini məyus etsə də, izləmə zamanı alınan təəssüratlara ciddi təsir etmir. Elə treylerin ilk saniyələrindən 2-ci sezona daha çox vəsait ayrıldığı aydın olur. Bu isə o deməkdir ki, bizi daha keyfiyyətli səhnələr və vizual effektlər gözləyir.
İndi isə keçək əsas məqamlara:
- Geralt və Siri, nəhayət ki, cadugərlərin əfsanəvi Kaer Morhen qalasına gəlir.
- Geralt Sirini döyüş texnikası sahəsində maarifləndirməyə başlayır.
- Materikin şimal və cənub əyalətləri arasında müharibə başlayır.
- Yeni əfsanəvi bədheybətlər peyda olmağa başlayır
- Yenniferə iztirablar verirlər. Çox güman ki, o, əsirlikdədir.
- Yasker (Jaskier .ing) zindandadır. Geraltın onun köməyinə ehtiyacı olduğu üçün onu zindandan çıxarmağa gedir.
Və, əlbəttə ki, bütün sadalananları peşəkarcasına təşkil olunmuş və lentə alınmış döyüş səhnələri tamamlayır.
İlk sezonda hekayənin təqdim olunma qaydasından narazı qalan izləyicilər bu dəfə dərindən nəfəs ala bilər. 2-ci sezonda süjetin daha aydın, cərəyan edən hadisələrin isə ardıcıl olacağı gözlənilir.
