24.06.2021-ci il tarixində Mircrosoft keçirdiyi təqdimat zamanı yeni Windows 11 əməliyyat sistemini təqdim etdi
Dünyada ən geniş yayılmış kompüter əməliyyat sistemi olan “Windows”u yeni versiyaya təkmilləşdirilmə gözləyir. Windows 11 əməliyyat sisteminin dəqiq buraxılış tarixi məlum olmasa da bu ilin payız aylarında buraxılacağı planlaşdırılır.
Bu əməliyyat sisteminin ilk əvvəl Microsoft ƏS–lərini dəstəkləyən planşetlər üçün buraxılacağı nəzərdə tutulsa da, proqram təminatında olunan genişmiqyaslı və köklü dəyişikliklər Microsoft şirkətinin planlarını dəyişdi. Microsoft şirkəti Windows 11 əməliyyat sistemində daha sadə istifadəçi interfeysi, sistem performansı və eyni zamanda çoxfunksiyalılığa üstünlük verib.
İnterfeysdə ilk nəzərəçarpan dəyişiklik tapşırıqlar panelindəki elementlərin ortaya doğru yerdəyişməsidir. Buna baxmayaraq “Başlat” düyməsini yenidən ekranın sol küncünə qaytarmaq da mümkün olacaq.
Bir neçə gündən sonra Windows 11 ƏS-nin ilk genişmiqyaslı sınaq mərhələsi başlanacaq. Hər kəs yeni əməliyyat sisteminin beta versiyasını yükləyərək onu sınaqdan keçirə bilər. Buraxılış zamanı isə həqiqi lisenziyalı Windows 10 ƏS-nin istifadəçiləri tamamilə ödənişsiz Windows 11 ƏS-dək təkmilləşmək imkanına malik olacaqlar.
Qeyd olunanlarla yanaşı Microsoft Teams və Xbox tətbiqi kimi proqram təminatları Windows 11 əməliyyat sisteminə uyğunlaşdırılıb. Windows 11 yalnız 64 bit versiyasında buraxılacaq, lakin Win32 formatlı proqram təminatını və ilk dəfə rəsmi olaraq android tətbiqlərini də dəstəkləyəcək. Eləcə də bu əməliyyat sistemində vidcetlərin görünüşü minimalistik üslubda dəyişdirilib.
Sözsüz ki, interfeys və funksiya baxımından dəyişikliklər Microsoft Store rəqəmsal mağazasından da yan keçməyib. Yuxarıda qeyd olunan android platforması tətbiqləri ilə yanaşı, bu mağazada Steam və Epic Games Store kimi rəqəmsal mağazaların da yer alacağı gözlənilir. Hələ bu məlumat rəsmi olaraq təsdiqlənməsə də, Microsoft şirkətinin belə planları barədə şirkətin “Windows and Devices” bölməsinin başçısı Panos Panay “The Verge” saytına verdiyi müsahibədə məlumat verib.
Əməliyyat sisteminin sistem tələblərinə gəldikdə isə bu məlumat istifadəçilər tərəfindən birmənalı qarşılanmayıb. Belə ki, Windows 11 əməliyyat sistemi yalnız bu siyahıda qeyd olunan Intel mərkəzi prosessorlarını dəstəkləyəcək. Qısacası isə Intel mərkəzi prosessorlarının 8000 və daha sonrakı seriyaları və daha məhdud sayda AMD mərkəzi prosessorları dəstəklənəcək. Windows 11 əməliyyat sisteminin dəstəklədiyi AMD mərkəzi prosessorlarının siyahısı ilə isə buradan tanış ola bilərsiniz.
Windows 11 ƏS-nin minimal sistem tələbləri:
• Mərkəzi prosessor (CPU): 1 GHz sürətli və 2 nüvəli
• RAM: 4 GB
• Görüntü ölçüsü: 1366×768 ölçüsünü dəstəkləyən 9 düymlük monitor
• Videokart (GPU): DirectX12 və ya WDDM 2.x. dəstəkləməlidir
• Diskdə boş yer: 64 GB
